ဆာလံကျမ်း ၄၁
ဆာ ၄၁ ဖျားနာဆောင်မှ ဆုတောင်းခန်း
ဒါဝိဒ်သည် အသဲအသန်ဖျားနာသည်။ ရန်သူများ တောမီးလောင်သောကြောင့် လက်ခမောင်း ခတ်ကြသည်။ ဘာမှမစွမ်းဆောင်နိုင်ဟု ပျော်ရွှင်ကြသည်။ ပြန်လည် နလံထူတော့မည်မဟုတ်။ လုံးပါး ပါးတော့မည်ဟု ယူဆကြသည်။ ရှင်နည်းရာ အဂ္ဂလူထွက်၊ မကျန်းမာ၍ အင်အားချို့တဲ့သည့်အကြား ဒါဝိဒ်၏ မိတ်ဆွေရင်းချာ တယောက်က သစ္စာဖောက်ပြန်သည်။
၄၁:၁–၃ ရောဂါဝေဒနာကို စိတ်ရှည်သီးခံသော်လည်း မသက်သာ၊ ထိုသို့အိပ်ယာထဲတွင် ထွေရာကမာ စဉ်းစားစဉ် ဘုရားသခင်သည် ဆင်းရဲဒုက္ခရောက်သူများကို ကယ်တင်တတ်ကြောင်း တရားရရှိသည်။ ဤနေရာတွင် ဆင်းရဲဒုက္ခရောက်သည် ဆိုခြင်းမှာ မွဲတေခြင်းမဟုတ်။ ကျန်းမာရေးချို့တဲ့၍ ဝေဒနာပြင်းထန်ခြင်း ကို ဆိုလိုသည်။ သူ့လူများ ဆင်းရဲဒုက္ခရောက်ချိန်တွင် ဘုရားသခင်က ကယ်မခဲ့ပုံ၊ ထောက်ပံ့ခဲ့ပုံ၊ ငြိမ်သက် ချမ်းသာရာ ပေးခဲ့ပုံများကိုလည်း သတိရသည်။ ထိုနည်းတူ ယခုအချိန်တွင်လည်း ဘုရားသခင်က သူ့အား ကူညီမစမည်ဟု ယုံကြည်သည်။ ခံယူသည့်အတိုင်းလည်း ဘုရားသခင်က အသက်ဘေးရန် လုံခြုံစေသည်။ ကျန်းမာရေးပြန်လည်ထူထောင်ပေးသည်။ အသဲအသန် ဖျားနာဝေဒနာပြင်းထန်စွာ ခံစားနေရသော်လည်း ဘုရားသခင်က ရန်သူများလက်ထဲသို့ ထားခဲ့မည်မဟုတ်ဟု သိရှိသောကြောင့် ဝမ်းမြောက်သည်။ ယခုချိန်တွင် ဖျားနာဆောင်၌ လူးလှိမ့်နေရသော်လည်း တဖန်ကျန်းမာရေး ပြန်ကောင်းလာမည်။ ဘုရားသခင်က လူနာသဖွယ် ပြုစုစောင့်ရှောက်မည်ဟု ခံယူသည်။
၄၁:၄ ဆာလံဆရာသည် ရှေးယခင်က ဘုရားသခင်၏ ကွယ်ကာစောင့်ရှောက်ခြင်း အပေါ်၌သာ မှိန်းမနေပါ။ လတ်တလော လုပ်သင့်လုပ်ထိုက်သည်ကို လုပ်သည်။ အပြစ်ဝန်ချတောင်းပန်၍ ဘုရားသခင်ထံ ဆုတောင်းသည်။ ယုံကြည်သူများ ဘဝခရီးတွင် ဖျားနာခြင်းဟူသမျှသည် အပြစ်ကြောင့်ချည်းမဟုတ်ပါ။ ဥပမာအားဖြင့် အသက်အရွယ်ကြီးရင့်သော လူအိုသူအိုများသည် အပြစ်ကြောင့် ဖျားနာသည်မဟုတ်။ ခန္ဓာကိုယ် အဟာရ ဓါတ်ကုန်ခမ်းခြင်း၊ ခုခံစွမ်းအားနည်းခြင်းတို့ကြောင့် ဖြစ်သည်။ တခါတရံတွင်မူ အပြစ်နှင့်ရောဂါ ဆက်စပ်ပါသည်။ ထိုအခါမျိုးတွင် ဘုရားရှင်တော်ထံသို့ စိတ်နှလုံးအကြွင်းမဲ့ ဆက်ကပ်ရသည်။ မဟာသမား တော်ကြီး၏ အပြစ်ခွင့်လွှတ်ခြင်းရရှိပြီးမှ ဆေးဆရာ၏ ကုသခြင်းခံယူရသည်။
၄၁:၅ ထိုအချိန်တွင် ရန်သူများသည် ဒါဝိဒ်၏နာရေးသတင်းစာကို စောင့်မျှော်နေကြသည်။ သေခါနီးပြီလား၊ သေတော့မည်လားဟု တယောက်ကိုတယောက် မေးငေါ့မေးမြန်းကြသည်။ ဘယ်လောက် ကြာကြာ စောင့်ရဦးမည်လဲဟု တီးတိုးပြောနေကြသည်။
၄၁:၆ ထိုရန်သူများမှ တစုံတဦးက လူနာသတင်း လာရောက်မေးမြန်းသည်။ သို့သော် စိတ်သက်သာရာ စကားမဆိုနိုင်။ မျှော်လင့်ချက်မပေးနိုင်၊ နှစ်သိမ့်ခြင်းမပြုနိုင်၊ တခွန်းပါဒမျှမရ၊ စင်စစ် ဒါဝိဒ်၏ကျန်းမာရေး သတင်း လာရောက်ထောက်လှမ်းဟန်ရှိသည်။ တကယ်လာရောက်လေ့လာသောအခါ အထင်နှင့် အမြင်တခြားစီ ဖြစ်သည်။
၄၁:၇–၈ ရန်သူများလည်း ဒါဝိဒ်၏မကောင်းသတင်း သွားပုပ်လေလွှင့်ပြောကြသည်။ အပြစ်ကျူးလွန် သောကြောင့် သေရတော့မည်ဟု ကောလဟာလပြောဆိုကြသည်။ ပြန်လည်ထူထောင်တော့မည်မဟုတ်ဟု ဝမ်းသာကြသည်။ တယောက်မျက်နှာ တယောက်ကြည့်၍ ပျော်ရွှင်ပြုံးပြကြသည်။
၄၁:၉ အဆိုးဝါးဆုံးမှာ ချစ်ဟန်ဆောင်သော မိတ်ဆွေက သစ္စာဖောက်ဖျက်ခြင်းဖြစ်သည်။ ဘဝကြေကွဲ ဝမ်းနည်းဘွယ်ရာများထဲတွင် ထိုအဖြစ်ဆိုးမျိုးသည် နာကျင်ခါးသည်းလှသည်။ အသားထဲကလောက်ထွက်သည်။ သခင်ယေရှုသည် ထိုအဖြစ်ဆိုးမျိုး ကြုံတွေ့ခဲ့သည်။ ယုဒရှကာရုတ်၏ သစ္စာဖောက်ခြင်းခံရသည်။
သခင်ယေရှုက ယုဒရှကာရုတ်အကြောင်းပြောရာတွင် ဤကျမ်းချက်ကို ကိုးကားသည်။ စကားလုံး အသုံး အနှုန်းလေးသာ ကွာခြားသည်။ “ငါယုံကြည်သော မိတ်ဆွေရင်းခြာက ဟုဆိုသည်။ ယုဒရှကာယုတ်က သစ္စာ ဖောက်မည့်အကြောင်းကိုလည်း ကိုယ်တော်ဘုရားကြိုသိရှိပါသည်။ ထိုအကြောင်းကို ယော ၁၃:၁၈တွင် “ငါနှင့် အတူစားသောက်သူသည် ငါ့ကိုခြေနှင့်ကန်ပစ်သတည်း”ဟု ဆိုထားသည်။
၄၁:၁၀ ဒါဝိဒ်က သူ့နောက်ကျောကို ဓါးဖြင့်ထိုးသူအား ရန်တုန့်ပြန်ဖို့ လှည့်မကြည့်။ ထိုသို့ နာကျင် နေမည့်အစား ရောက်လာမည့်ကျေးဇူးတော်ကို မျှော်ကြည့်သည်။ အခြားသူများက စွန့်ခွာထွက်ပြေးကြသော်လည်း ဒါဝိဒ်သည် ဘုရားသခင်က မပစ်ပယ်ကြောင်း ယုံကြည်စွဲလန်းသည်။ ခွန်အားသစ်ရရှိမည်ဟု ယုံကြည်သည့် အတိုင်း ဆုတောင်းသည်။ “ထိုသူများ၏အပြစ်ကို အကြွေးဆပ်ပေးဖို့ သူ့ကိုထမြောက်စေပါ“ဟု ထူးထူးခြားခြား ဆုတောင်းသည်။ ဤနေရာတွင် သတိပြုစရာအချက်မှာ ဒါဝိဒ်သည် ဘုရားသခင်ဘိသိက်ပေးထားသော က္ကသရေလအရှင်ဖြစ်သည်။ သစ္စာဖောက်များကို မင်းကျင့်တရားနှင့်အညီ အရေးယူနိုင်သည်။ သူများက လူလိမ် လူညာ ဗီလိန်ဟု စွပ်စွဲကြသော်လည်း ပြန်လည်ကျန်းမာလာသည့်အခါ မင်းပြစ်မင်းဒဏ်သင့်စေဖို့ မရည်ရွယ်။
၄၁:၁၁–၁၂ ရန်သူများ အကြံပျက် ဖရိုဖရဲဖြစ်ကြသည့်အကြောင်း ဒါဝိဒ်သိသည်။ ဘုရားသခင်၏ မစခြင်း ခံယူမည့်အကြောင်းလည်း သိမည်။ ထိုအကြောင်းကို ဤသို့မြွက်ဆိုသည်။
ကိုယ်တော်သည် အကျွန်ုပ်ကို စုံလင်စေခြင်းသို့
မစ၍ ကာလအစဉ်အဆက် ရှေ့တော်ထံမှာ
နေရာပေးတော်မူလော့။
ဤကျမ်းစကားကို ကြည့်လျှင် ဒါဝိဒ်သည် သူ့ယုံကြည်ခြင်းကို ဝါကြွားလွန်းသည်ဟု ထင်စရာရှိသည်။ သို့သော် ထိုသို့ဆိုလိုသည်မဟုတ်။ သူ့တွင် အားနည်းချက် ချို့ယွင်းချက်ကြီးမားသော်လည်း ဘုရားသခင်အပေါ် ယုံကြည်ခြင်း မကျဆင်းဟု ဆိုလိုပါသည်။ ရန်သူအင်အားနှင့် နှိုင်းယှဉ်သည်။ သူသည် မပြောစလောက်ပါ။ သို့သော်လည်း သူကိုးကွယ်သော ဘုရားသခင်က ချီးမြောက်မစမည်ဟု အစဉ်မပြတ်ယုံကြည်သည်။ ထိုအကြောင်းကို Gelineau က ဤသို့ဆိုထားသည်-
အကယ်၍ ကိုယ်တော်မပါလျှင် ဘေးရန်ရောက်စရာ မရှိသည့်အပြင် ကိုယ်တော်ထံပါးတွင် အစဉ် ဇိမ်ကျနေပေမည်။
ဤဆာလံကျမ်းတွင် ဒါဝိဒ်သည် သူ့အခြေအနေ အရည်အချင်းအားလုံးကို ပစ်ခွာပြီး ဘုရားသခင်ကို လုံးလုံးလျားလျား အားကိုးထားသည်။ သူဘဝသေရေးရှင်ရေးတွင် ကျေးဇူးတော်သည် လုံလောက်သည်။ ကောင်းကင်နိုင်ငံတွင် ထာဝရစံမြန်းမည်ဟု တထစ်ချယုံကြည်သည်။
၄၀:၁၃ ယုံကြည်စိတ်ချသည့်အတိုင်း ဆာလံဆရာသည် အသံလွှင့်အော်ဟစ်၍ ဘုရားရှင်ကို ချီးမွမ်းသည်။ ကတိတော်ပြည့်စုံလေ့ရှိသော ယေဟောဝါဘုရား၊ ဣသရေလတို့၏ ဘုရားသည် ထာဝရကာလပတ်လုံး ရှိခိုး ကိုးကွယ်ထိုက်ပါသည်။ သို့ကြောင့်လည်း ရင်နှင့်အမျှ အာမင်၊ အာမင်ဟု နှစ်ထပ်ကွမ်း ကောင်းချီးပေးလိုက်သည်။